El Principáu trabaya nun plan pa meyorar la movilidá nes zones costeres en temporada alta

Los Conceyos costeros quieren xestionar el colapsu de los pueblos col turismu pel branu

El Gobiernu d'Asturies trabaya nun plan pa meyorar la movilidá nes zones costeres, especialmente na temporada alta turística, cuando la llegada de visitantes a les sableres xenera problemes de tráficu y aparcamientu.

Esti proyectu integral, qu'inclúi l'usu de tecnoloxíes avanzaes, nueves normatives y la creación d'un ximielgu dixital del territoriu, busca optimizar la esperiencia de residentes y turistes, garantizar la seguridá vial y promover la sostenibilidá ambiental.

Pa ello, dende la Conseyería de Presidencia, Retu Demográficu, Igualdá y Turismu trabaya na optimización del tráficu y xestión del aparcamientu. Al traviés de la regulación d'aparcamientos y la identificación de vehículos por aciu de tecnoloxíes de sensores y cámares, va buscase meyorar la circulación nes víes d'accesu a les sableres y asegurar un usu eficiente de los espacios.

Tocante a información en tiempu real y seguridá vial, l'executivu asturianu trabaya na instalación de sensores en túneles y víes d'alta capacidá pa monitorizar el tráficu y aumentar la seguridá. Amás, al traviés de mupis dixitales va apurrise información actualizada sobro les condiciones del tráficu y la disponibilidá d'aparcamientos, facilitando asina la planificación de los desplazamientos.

El plan inclúi midíes p'amenorgar l'impactu ambiental del tráficu, promoviendo l'usu del tresporte públicu y meyorando la xestión de recursos al traviés de tecnoloxíes avanzaes.