Menos xente, menos incidencies y más basura nel antroxu de branu de Lluanco

Na playa concentráronse unes 3.000 persones

Menos xente, menos incidencies y más basura ye’l balance del antroxu de branu de Lluanco que faen dende’l dispositivu de seguridá que cuntó con mediu centenar d’efectivos pa controlar una fiesta que s’allargó hasta esta madruga na playa y nes cais de la villa.

Nueche del antroxu de branu de Lluanco ensin incidencies destacables con una decena d’identificaos por pequeñes griesques y tenencia de droga. Según datos de la Policía Local, na playa concentráronse unes 3.000 persones, unes 1.000 menos que l’añu pasáu.

Santiago Cañal, Xefe de la Policía Local de Gozón, esplicó que baxaron tamién les atenciones sanitaries, con una docena de menores por escesu de consumu d’alcohol.

Lo que medró esti añu foi la basura. Dende primer hora los servicios de llimpieza trabayaron na playa y nes cais de Lluanco. A les 10:00 la sablera taba llimpia, con una imaxe bien distinta a la d’ayeri pela nueche, onde los bañistes dieron el relevu a los folixeros.