La web miPrincipado sedrá la canal de comunicación bidireccional con ciudadanía y empreses

La primer versión del proyectu tará disponible en seronda

El Gobiernu d’Asturies impulsa miPrincipado, una aplicación web que se convertirá na canal de comunicación bidireccional de l’Alministración autonómica cola ciudadanía y les empreses. La primer versión del proyectu tará disponible en seronda y inxertará espacios especiales pal empresariáu y pa les rellaciones col sector de la xusticia.

“L’oxetivu ye avanzar pa una Alministración personalizada y proactiva, que dea una rempuesta más rápida y eficaz, pente medies del análisis de datos”, esplicó’l director xeneral d’Estratexa Dixital y Intelixencia Artificial, Javier Fernández, que presentó esti vienres la ferramienta tecnolóxica na Feria Internacional de Muestres d’Asturies (Fidma), en Xixón.

El Principáu invertirá 900.000 euros esta aplicación, que dirá completándose por fases.

MiPrincipado supón la evolución de la sede electrónica tradicional, un pasu más na apuesta del Executivu pa una Alministración cercana, confiable y eficaz, llinies estratéxiques del área que dirixe Fernández, inxerta na Conseyería de Presidencia, Retu Demográficu, Igualdá y Turismu.

“Amás de recibir información venceyada colos intereses rexistraos, l’aplicación valdrá pa facer consultes, xubir datos como la cuenta bancaria y, en definitiva, pa facilitar les xestiones de la ciudadanía y de les empreses col Principáu, faciéndoles más áxiles y cencielles”, solliñó Fernández.

Los xestores tendrán información detallada de les persones o empreses solicitantes, lo que dexará xenerar campañes informatives, según los sos intereses; facer el siguimientu de les consultes formulaes y tener estadístiques pa detectar problemes comunes o falta d’información sobre temes concretos.

L’accesu a miPrincipado podrá facese como persona convidada o con rexistru, bien con certificáu dixital, DNI electrónicu o cl@ve.