Llutu nel saltu base pola muerte en Ponga d'un aficionáu xixonés

La 'Asociación Española de Salto Base' analizará'l socesu xunto al serviciu de monte de la Guardia Civil

Conmoción pola muerte d’un xixonés que morrió ayeri cuando practicaba saltu base n’El Picu Tiatordos, en Ponga. Dende l’entornu del montañismu y los deportes de riesgu, llaméntase la so muerte, anque se recuerda la so peligrosidá, munches vegaes nel 50% de los casos.

Ye Felipe A.A., de 43 años. El so cadabre ta enagora a la espera de l’autopsia nel Institutu de Medicina Llegal.

L’home yera conocíu como 'Figi' nel entornu del montañismu y los deportes de riesgu, por practicar esta modalidá.

La 'Asociación de Veteranos de Paracaidistas del Ejército' recuerda qu’estos saltos fáense dende’l monte, onde se cueye la so peligrosidá, esplica José Antonio Martínez, representante institucional d’ASVEPA Asturies.

Dende l’Ayuntamientu de Xixón el conceyal de deportes, Jorge Pañeda, manifestó que llamenten la so pérdida y unvien condolencies a los familiares y collacios.

La Guardia Civil fizo ayeri’l llevantamientu del cadabre y foi l’helicópteru del 112 el que fizo’l treslláu.

La 'Asociación Española de Salto Base' analizará’l socesu xunto al serviciu de monte de la Guardia Civil

La 'Asociación Española de Salto Base' entá ta asimilando la noticia de la muerte del so compañeru xixonés. Nos díes vinientes, analizarán xunto al serviciu de monte de la Guardia Civil, el Greim, los motivos del accidente.

Pa ello valdránse de dos ferramientes: los vídeos del vuelu grabaos pola cámara del deportista y tamién el dispositivu GPS que llevaba y que rexistró tol vuelu.

En declaraciones a TPA Noticies, el presidente de l’asociación española, David Gutiérrez, afonda en que los que practiquen esti deporte reciben enantes una llarga y intensa formación. Nun s’almite en cursos de saltu base a los que nun ficieren un mínimu de 200 saltos en paracaíes dende un avión.

Nesti tipu de vuelos con traxe d’esnales puen algamase hasta 200 kilómetros per hora de velocidá.