Vivienda destina 3,8 millones pa remocicar 226 pisos en Valdés

Zapico visita 45 viviendes públiques nes que se ficieron trabayos de reparación

La Dirección Xeneral de Vivienda piensa destinar más de 3,8 millones a rehabilitar, caltener, y meyorar la eficiencia enerxética y accesibilidá de 226 pisos en Valdés, según señaló’l conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico.

El conseyeru fizo esti anunciu nuna visita a les 45 viviendes públiques de la cai Mártires de Mathausen, n’Almuña (Valdés), nes que se ficieron trabayos de reparación de les fachaes y llimpieza y caltenimientu de canalones.

“Son obres que demuestren el compromisu de la conseyería col parque públicu de vivienda y colos barrios de la xente trabayador; son trabayos mui necesarios”, esplicó Zapico, que solliñó que l’oxetivu ye que “se viva na vivienda pública con arguyu, ensin estigmes y nun marcu de convivencia”.