El meyor quesu de Cabrales del añu algama los 36.000 euros y bate un nuevu récord

Iván Suárez, del Llagar de Cualloto, el que más puyó por algamar la pieza

El meyor Cabrales del añu foi puyáu esti domingu por 36.000 euros, una cifra nunca algamada nes 52 ediciones del certame dedicáu a la mena de quesu más reconocida d'Asturies y que per meses maurez en cueves naturales de los Picos d'Europa.

Al igual que'l pasáu añu, foi Iván Suárez, del Llagar de Cualloto, d'Uviéu, el que más puyó por algamar esta pieza que tampoco va tener problemes pa caltenese nel Guinnes World Records como'l quesu más caro de cuantos se puyen nel mundu anguaño.

Esta conocida variedá de quesu asturiano ta en posesión d'esti récord dende 2018, anque nesta puya superáronse en 6.000 euros los 30.000 que'l pasáu añu pagó'l Llagar de Cualloto na tradicional puya que l'últimu domingu d'agostu se lleva alantre n'Arenas (Cabrales).

Nesta ocasión, foi un pieza d'unos dos quilos y mediu ellaborada pola quesería Ángel Díaz Herrero, de Tielve, la que foi escoyida pol xuráu como la meyor de los quince productores que participaron nel concursu y que foi oxetu de la posterior puya.