Aumenta'l númberu de presos condergaos por maltratu

Concentración en Xixón escontra la violencia machista

Nes cárceles españoles aumenta'l númberu de presos condergaos por violencia machista. El númberu d'homes que cumplen pena por maltratu supón yá'l 21% del total de los internos nes cárceles. Ta percima, por casu, del porcentaxe de reclusos por delitos de droga, que suponen un 15% del total.

Más de la metá de los presos cumple condena por robos.

Daqué más d'un 3% de los presos ta na cárcel por delitos escontra la seguridá vial.

A finales de 2023, les cárceles españoles teníen más de 56.500 presos, cuasi 1.000 más qu'un añu enantes.

Nel casu d'Asturies, el centru penitenciariu tien un millar de presos, de los que 100 son muyeres.

Concentración en Xixón escontra les violencies machistes

Precisamente güei, decenes de persones concentráronse na Gota de Lleche de Xixón escontra la violencia machista. Ye la concentración que se vien celebrando l'últimu miércoles de cada mes, convocada por dellos colectivos feministes de la ciudá.

L'oxetivu d'esti actu mensual ye recordar a les víctimes asesinaes pola violencia machista y llanzar un mensaxe de reflexón. Quieren crear concencia sobre la magnitú d'esti problema y repitir la necesidá de pone-y frenu de manera urxente.