Miguel Vega anueva nel negociu familiar de fabricación de cuchiellos y navayes en Taramundi

El mozu de 17 años ufierta la posibilidá a los turistes de fabricar la so propia navaya

Miguel Vega tien 17 años y ye unu de los munchos estudiantes que tienen qu'abandonar la zona rural pa estudiar y formase. Va cuatro años que s'interesó pol negociu familiar, una cuchillería en plenu centru de Taramundi.

Estudia n'Uviéu, pero esti branu quixo anovar na cuchillería de so padre. Ocurrióse-y ufiertar a los turistes la posibilidá de faer la so propia navaya.

Pequeña llección teórica y muncha práctica. Tres una hora de trabayu, los visitantes lleven pa casa una navaya montada por ellos mesmos. Esta novedosa idea entamadora tuvo munchu ésitu.

Pero Miguel nunos díes va volver a los estudios y el taller va tener que pasar a un segundu planu pa él. Quier siguir con esta iniciativa dellos fines de selmana. Un oficiu, el de cuchilleru, qu'en Taramundi nun tocó inda techu.