La Basílica de San Xuan el Real, sede de la segunda parroquia más antigua d'Uviéu

Un edificiu que tien un estilu arquitectónicu que nun dexa indiferente a naide y ye llugar de pasu de munchos turistes

Conozse como la Catedral del Ensanche por tar construyida no qu’una vegada foi la zona d’espardimientu urbanísticu de la ciudá. Y porque en popularidá, llega a competir cola propia catedral uvieína señala Francisco Javier Suárez, párrocu de San Xuan el Real.

El templu llevantóse en tres años, de 1912 a 1915, baxo la dirección del arquitectu Luis Bellido. Como parroquia, sicasí, San Xuan ye la segunda más antigua d’Uviéu tres de Santiso. El so orixe remóntase a una antigua ilesia románica del sieglu XII anexa al hospital de pelegrinos.

Tanto l’aspectu esterior como l’interior destaca pola maxestuosidá de les sos formes, d’estilu neorrománicu y polos sos abondos elementos ornamentales.

Característicos, el baldaquinu del altar, la cúpula central, los frescos que decoren el techu o les sos imponentes vidrieres. Na so fachada, pasa cuasi desapercibíu un proyectil de la Guerra Civil que quedó inxertu ensin llegar a españar. Como efeméride, San Xuan acoyó en 1923 l’enllaz de Francisco Franco y Carmen Polo. Enagora, ye una basílica que mira al futuru y que retresmite les sos mises y actos relixosos al traviés de la so canal de youtube.