El debate d'orientación política entamará'l 24 de setiembre

La Llei de Turismu y les Escuelines, nel primer plenu ordinariu de la Xunta

El debate d’orientación política, más conocíu como’l debate sobre l’estáu de la rexón, celebraráse na Xunta Xeneral los díes 24, 25 y 27 de setiembre, según propunxo’l presidente del Principáu, Adrián Barbón, y afitó esti miércoles la xunta de voceros del parllamentu autonómicu.

El plenu d’orientación política entamará’l martes 24 de setiembre cola intervención, per tiempu ensin llende, del presidente Barbón, y siguirá al día siguiente cola de tolos grupos parllamentarios y les répliques y contrarrépliques del xefe del Executivu.

Dempués del debate, la sesión suspenderáse pa que les distintes formaciones puean presentar les sos propuestes de resolución que sedrán tramitaes y votaes al reanudase la sesión plenaria dos díes dempués, el vienres, día 24.

Sicasí, el primer plenu d’esti nuevu periodu de sesiones sedrá l’institucional que se celebrará’l vienres 7 de setiembre, por mor de la celebración del Día d’Asturies.

El primer plen ordinariu entá nun foi afitáu porque los voceros diéronse de plazu hasta mañana pa decidir si se celebra dientro de dos selmanes, enantes del debate d’orientación política, o se dexa pa ochobre.

Lo que decidieron ye que la selmana qu’entra reanudaránse les comisiones parllamentaries y qu’entamarán coles de Transición Ecolóxica, el miércoles, 11 de setiembre, y siguirán coles de Cultura, Derechos Sociales, Presidencia y Mediu Rural.

La selmana qu’entra habrá tamién comparecencies de la Llei de Proyectos Estratéxicos que se ta tramitando y zarraráse, el día 12, el plazu que s’abrió güei pa la presentación d’enmiendes a la Llei de Ciencia.

Ayeri remató’l plazu pa la presentación d’enmiendes a la Llei de Turismu a la que Vox presentó una de totalidá, como a la d’Escuelines, que sedrán oxetu de debate nel primer plenu ordinariu que celebre la Xunta Xeneral.