El gobiernu va negociar la tasa turística municipal coles patronales del sector

Peláez tresmite tranquilidá y afita que la ecotasa va ser de calter voluntariu

El voceru del Gobiernu asturianu y conseyeru de Facienda y Fondos Europeos, Guillermo Peláez, aseguró esti vienres que la tasa turística municipal que PSOE y IX quieren poner en marcha va ser oxetu de negociación con toles organizaciones empresariales del sector.

"Tamos abiertos al diálogu pa qu'a la fin la tasa seya coherente y cumpla los oxetivos pa la que ta diseñada: meyorar el financiamientu de los conceyos y ayudar a una distribución de los fluxos turísticos per tol territoriu pa que tolos asturianos se beneficien", señaló énte les crítiques qu'esta propuesta provocó na patronal de hostelería y turismu d'Asturies Otea.

Na rueda de prensa posterior al primer Conseyu de Gobiernu del nuevu cursu políticu, Peláez señaló que "toles asociaciones tienen que tar tranquilos" porque va haber diálogu pa regular dende'l Principáu'l "paragües llegal" que dexe a los conceyos aplicar la ecotasa con calter voluntariu.