L'arzobispu d'Uviéu niega que les sos palabres escuendan sigles polítiques, sí xuiciu moral

Álvaro Queipo, Adrián Pumares y Carolina López siguieron la misa dende la basílica

L'arzobispu d'Uviéu, Jesús Sanz Montes, alvirtió dende'l púlpitu de la basílica de Cuadonga que nun necesita que naide-y enseñe cómo faer una homilía nin que traten de censuralu acusándolu de "ultraderechista" porque, según sorrayó, les sos palabres nun escuenden detrás sigles política, sinón un xuiciu moral.

"Esti púlpitu nun tien detrás unes sigles polítiques anque dalgunos s'enfoten en poneles, sinón un xuiciu moral que naz de la palabra de Dios y de la tradición cristiana", afirmó na celebración de la misa de Cuadonga, que per primer vegada dende la constitución de l'autonomía asturiana nun cuntó cola presencia de les principales autoridaes autonómiques.

El pasáu 30 d'agostu, el presidente del Principáu Adrián Barbón, reconocíu creyente, anunció que, per primer vegada desque aportó al gobiernu en 2019, nun diría a esta celebración na que "siempres hai polémica", en referencia a les homilíes del arzobispu, pa evitar que la so presencia contribuyera a xenerar enfadu y tensión.