El senséi Miguel Feo trabaya en crear una escuela de Ju-Jitsu n'Argüeru

Una eminencia internacional n'artes marciales que pondrá Asturies nel mapa

Col so hermanu, Miguel Feo, entamó l’andadura nes artes marciales col yudu. Dempués siguió formándose n’otres especialidaes hasta convertise nún de los referentes internacionales del Ju-Jitsu tradicional xaponés, una disciplina qu’usaben los samuráis y que tien como envís derrotar al enemigu usando la so propia fuerza escontra él.

Con 52 años de práctiques al llombu, Miguel quier traer a Argüeru la so propia escuela d’esti arte, al algame de toles edaes y xéneros. Amás, el centru sedrá la sede l’añu viniente del seminariu internacional de Ju-Jitsu.

Anguaño, Feo ye instructor en cursos p’axentes de cuerpos de seguridá nos qu’enseña defensa personal y llaves como la 'kote ineri' o 'kote mawashi'.

Estes habilidaes y conocimientos milenarios sedrán la base d’un proyectu que dará proyección internacional a Asturies y a España.