99.906 estudiantes d'Infantil, Primaria, ESO y Bachilleratu entamen el cursu n'Asturies

Espina destaca la baxada progresiva de la ratiu de 25 a 23 neños per aula

Un total de 99.906 estudiantes d’Infantil, Primaria, Secundaria (ESO) y Bachilleratu entamaron esti martes n’Asturies el nuevu cursu escolar, una cifra que supón una mengua del 1,6 por cientu al respective del añu pasáu, según les cifres asoleyaes pol Principáu.

Infantil y Primaria sumen esti cursu 56.263 alumnos y alumnes, lo que representa un recorte del 2,6 por cientu, una cayida que, sicasí, ye menor a la de los dos últimos cursos, cuando foi superior inclusive del 3 por cientu, dixo la Conseyería d’Educación.

D’esi total, 39.951 matrícules correspuenden a la rede pública, un 2,8 por cientu menos que l’añu pasáu, y 16.312, a la privada y concertada, un 2,1 por cientu menos.

Xixón ye’l conceyu con más estudiantes n’Infantil y Primaria, con 14.963; siguíu d’Uviéu, con 13.389, y Avilés, con 4.938.

Per parte de so, la matrícula de Secundaria y Bachilleratu xube a 43.643 estudiantes, lo que supón una mengua del 0,29 por cientu al respective del cursu anterior.

Na enseñanza pública rexistráronse 33.363 matriculaciones de Secundaria y Bachilleratu, un 0,1 por cientu más que l’añu pasáu, mientres que les correspondientes a la privada y a la concertada baxaron un 1,6 por cientu, hasta 10.280.

Xixón tamién ye’l conceyu con más estudiantes nestes etapes, con 12.059; siguíu d’Uviéu, con 10.341, y Avilés, con 3.963.

Educación recordó que nesti cursu inxertaráse la mengua progresiva de la ratiu a 23 per aula y la tarifa unificada a 4,5 euros del preciu de los comedores escolares dependientes del Principáu.

En cuantes a la dotación de personal pa la rede pública, la plantiya orgánica aprobada en marzu xube a 9.519 puestos, lo que supón una mengua de sólo seis places (-0,06%) a pesar de la mengua na matrícula del alumnáu, resaltó la conseyería, que recordó que les cifres fueron negociaes colos sindicatos de la enseñanza col envís d’avanzar na meyora del sistema educativu.

Al respective, Educación destacó que l’informe del Sistema Estatal d’Indicadores 2024 asoleyáu esti branu pol Ministeriu d’Educación asitia al Principáu como la tercer comunidá con meyor proporción d’alumnáu por docente, con una media de 9,7, namás tres d’Estremadura (9,4) y Cantabria (9,1).

L’estudiu tamién afita qu’Asturies ye la cuarta comunidá con mayor gastu por estudiante, namás tres del País Vascu, Navarra y Cantabria.

L’últimu datu oficial disponible -correspondiente a 2021- cífralu en 8.140 euros, lo qu’equival a 1.355 euros más qu’en 2016 y 759 más qu’en 2019, xusto enantes del periodu de pandemia, apuntaron dende la conseyería.

Espina destaca la baxada progresiva de la ratiu de 25 a 23 neños per aula

Esti ye’l cursu nel qu’entama a afitase la baxada progresiva de la ratiu de 25 a 23 neñes y neños per aula. Entámase per Primeru de Primaria y la midida dirá espardiéndose añu a añu al restu de cursos y etapes.

Nuna entrevista en TPA Noticies Matinal, la conseyera d’Educación, Lydia Espina, reconoz que la baxada de la natalidá facilita esa mengua, que n’Asturies va aprovechase pa meyorar la calidá de la enseñanza.

Pa contrarrestar el declive demográficu ta pensáu’l proyectu estrella d’esta Conseyería, la rede autonómica de 'Escuelines' de cero a tres. Lydia Espina ta convencida de qu’esti nuevu serviciu públicu y de baldre atraerá families de fuera.

Sobre les reclamaciones llaborales pendientes, una d’elles la xubida salarial a los docentes, Espina afirma que nesta llexislatura, dempués del alcuerdu robláu colos sindicatos pa invertir más de 26 millones d’euros en meyorar la enseñanza, nun hai marxe pa más.