Aules modulares nel Institutu Rei Pelayo de Cangues d'Onís

El CRA de Pría nun entama les clases por suciedá nel aula

Ensin portiella d’accesu na so entrada principal, unes valles ocupen la entrada al patiu central del Institutu Rei Pelayo de Cangues d’Onís, onde entamó un nuevu cursu académicu.

Con normalidá y nes dependencies avezaes según los responsables d’esti centru onde, a falta de los remates finales, aseguren dende la conseyería d’Educación, entá nun acabaron les obres del nuevu edificiu pol que lleven esperando dende va dellos años, asegura Elías González Corteguera, secretariu del AMPA IES Rei Pelayo,

Bien llueu entamará’l desmontaxe de la grúa, pero entá falta la urbanización del patiu y de les canches deportives asitiaes xunto al nuevu edificiu, asina como otros trabayos en distintes dependencies del Rei Pelayo.

Por más que, a la fin, los actuales 500 alumnos y alumnes del Institutu cangués vayan a estrenar esti cursu les nueves instalaciones, nestos diez años hubo otros qu’inclusive acabaron los sos estudios d’ESO y Bachilleratu y hasta la so carrera universitaria ensin llegar a esfrutales.

El CRA de Pría nun entama les clases por suciedá nel aula

Los seis alumnos y alumnes del colexu rural de Pría pasaron la primer xornada llectiva d’esti cursu xugando nel patiu. Los menores, d’ente los 8 y los 12 años, nun pudieron entrar en clase porque la única aula ta enllena de polvu por unes obres recientes y con ciertos problemes de seguridá, según los afectaos.

L’Ayuntamientu de Llanes quier acondicionar l’aula del colexu de Pría bien llueu, porque recientemente ficiéronse unes obres p’anovar el suelu. L’alcalde, Enrique Riestra, reconoz que nun taba en perfectes condiciones.

Precisamente, un grupu d’operarios municipales fueron a media mañana pa llimpiar la clase del colexu rural de Villanueva.