La construcción del Ayuntamientu de Pravia pagóse coles rentes de la pesca del salmón

Un edificiu con una fachada de dos pisos na que destaca'l balcón central voláu

En La Plaza la Marquesa de Casa Valdés, en plenu cascu históricu de Pravia, ta l’Ayuntamientu. Un edificiu de 1779, que supunxo l’afitamientu del neoclasicismu d’aquella dómina.

Ye un edificiu mui sobriu, con una fachada de dos pisos na que destaca’l balcón central voláu.

Cristina Jerez, bibliotecaria de Pravia, esplica que les obres pagáronse gracies a la media renta algamada de la pesca del salmón.

Na planta baxa, anguaño, ta’l xulgáu. Pero non cuando se construyó, porque ehí allugáronse les escueles nacionales, asina como la primer biblioteca de la villa.

En dalgún momentu, colocóse na fachada principal un campanariu y un reló, que se tuvo que quitar.

Amás, nes ultimes décades, los sos pasiellos o’l salón de plenos convirtiéronse nuna pinacoteca con obres de Favila, Carriles o Fontela, asina como de dalgunos de los participantes del concursu de pintura San Miguel, que se celebra añalmente nel conceyu.