Prendes pide más medios pa la Fiscalía en plenu procesu de dixitalización

María Eugenia Prendes, nueva fiscal superior del Principáu d'Asturies

La nueva fiscal superior del Principáu d’Asturies, María Eugenia Prendes, alvirtió esti martes de la falta de medios materiales y personales nun momentu nel que la Fiscalía ta en "plenu procesu de dixitalización".

"Siempres falten medios hasta’l puntu en qu’hai vegaes en que les nuestres funciones nun se puen desendolcar ayayadizamente", alvirtió enantes del actu de la so toma de posesión nel que tuvo presente’l fiscal xeneral del Estáu, Álvaro García Ortiz, y el xefe del Executivu asturianu, Adrián Barbón.

Prendes esplicó que la Fiscalía ta en "plenu procesu de dixitalización" y ye, poro, un "momentu críticu", porque entá conviven el "papel y l’espediente electrónicu".

"Ehí notamos la falta de medios tanto materiales como personales", apuntó en rempuesta a les entrugues de los periodistes la nueva fiscal, que se comprometió a averar esti órganu a la sociedá pa que lu conoza y evitar asina’l "riesgu de que se creen personaxes que nun se correspuenden cola realidá".

Prendes, que tuvo al frente de la Fiscalía delegada de Violencia de Xéneru d’Asturies dende 2012, espresó la so "esmolición y interés poles víctimes en xeneral y poles muyeres en particular".