Les víes convencionales concentren los cuatro accidentes mortales del branu n'Asturies

Raquel Casado: "Los datos siempres sedrán malos mientres haya un solu muertu en carretera"

Los cuatro accidentes mortales rexistraos en xunetu y agostu n’Asturies nos que morrieron cinco persones fueron en carreteres secundaries de la comunidá, según el balance de siniestralidá vial del branu de la Dirección Xeneral de Tráficu.

Los muertos nes víes del Principáu menguaron en rellación al mesmu periodu del añu pasáu, cuando se contabilizaron nueve víctimes, una tendencia a la baxa que contrasta cola medría nel total del país que pasó de 238 a 241.

En xunetu hubo dos accidentes mortales n’Asturies nos que morrieron otres tantes persones, dos menos qu’en xunetu de 2023, mientres que n’agostu hubo dos siniestros con tres muertos, dos menos que nel mesmu periodu del exerciciu anterior.

El númberu de persones mancaes nestos accidentes, toos ellos por salida de la vía, que necesitaron hospitalización fueron 29, frente a les 28 del branu pasáu.

Los cinco muertos en xunetu y agostu nel Principáu yeren homes, sobre manera con una edá comprendida ente los 44 y 55 años, y ún d’ellos yera usuariu de motocicleta, tres de turismu y otru d’una motocicleta non homologada.