Los menores de Gaza trataos nel HUCA siguen los sos tratamientos con normalidá

Los neños y les sos families reciben atención psicosocial gracies a un proyectu impulsáu por Accem

Los dos menores gazatís que llegaron en xunetu a Asturies pa ser trataos d’urxencia nel HUCA siguen los sos tratamientos con normalidá. Reciben tamién, como los sos familiares, atención psicosocial gracies al proyectu 'Cunina', impulsáu pola ONG Accem.

Llegaron en xunetu dende Gaza pa ser atendíos en diferentes hospitales españoles en función de les sos patoloxíes. Dos de los 15 menores, fueron a Asturies pa ser trataos nel HUCA.

Ún sigue ingresáu con mancadures por metralla y l’otru sigue con tratamientu ambulatoriu, esplica Carolina Flores, coordinadora del Proyectu Cunina de la ONG Accem.

Dende la ONG Accem encárguense del procesu d’intervención psicosocial. Ye fundamental, aseguren, un acompañamientu constante y tratamientu psicolóxicu y lo más complicao, qu’entá tienen seres queríos en Gaza.

Ye un proyectu d’emerxencia humanitaria pero con posibilidá de futuru. Les dos families gazatís d’Asturies solicitaron yá protección internacional, pa poder entrar nun programa d’acoyida más estable.