Unos envases metálicos con restos de pintura, posible orixe del incendiu en Coxersa

Roqueñí piensa conocer esti mesmu mes l'informe sobre l'incendiu

La conseyera de Transición Ecolóxica, Industria y Desendolcu Económicu, Nieves Roqueñí, avanzó esti miércoles, con "toles precauciones", qu’unos "envases metálicos con restos de pintura y disolvente" podríen ser l’orixe del incendiu declaráu’l mes d’abril pasáu na planta de fracción restu del Consorciu de Xestión de Residuos Sólidos (Coxersa), órganu qu’esti mes cuntará col informe final que dexará esclariar los fechos y tomar decisiones sobre posibles reclamaciones futures.

En rempuesta a una entruga formulada na Xunta Xeneral pol PP sobre la investigación del siniestru, la conseyera señaló que nel recintu cúmplese la normativa industrial, anque l’incendiu va llevar a un replanteamientu de les polítiques de riesgos de la instalación asina como "tomar les midíes preventives y correctives necesaries pa impedir nuevos infortunios".

Roqueñí quixo ser "prudente" en cuantes a adelantar conclusiones del informe encargáu por Coxersa, qu’aunque ta "bastante avanzáu" ta entá en fase de fechura, y espérase que tea rematáu nes "selmanes vinientes".

L’informe tien una alta complexidá técnica col envís d’algamar una "reconstrucción real y oxetiva" del incendiu del 24 d’abril pasáu, dixo.