El sector pesqueru asturianu va recibir 5,7 millones d'euros pa impulsar la so modernización

Les ayudes cunten con un plazu temporal de dos años y distribúyense en tres llinies

El Gobiernu d'Asturies aprobó esti vienres un paquete d'ayudes por valir de 5.710.000 euros pa sofitar la modernización del sector pesqueru.

Estes subvenciones, que se dan dientro del reglamentu del Fondu Européu Marítimu de Pesca y Acuicultura (Fempa) y cunten con un plazu temporal de dos años, distribúyense en tres llinies, según detalla la reseña del Conseyu de Gobiernu celebráu esti vienres.

La primera d'elles, dotada con 3,75 millones d'euros, va sirvir pa promover la viabilidá económica, l'atractivu y la competitividá de la pesca, l'acuicultura y el tresformamientu y comercialización de los sos productos.

Amás, el Principáu va destinar 1,3 millones a la optimización del usu de la enerxía de los buques, col envís d'amenorgar les sos emisiones y el consumu de combustible pa combatir el cambéu climáticu.

Estos fondos tamién van financiar iniciatives pa meyorar la hixene, la salú, la seguridá y les condiciones de trabayu de los trabayadores, col enfotu de favorecer el relevu xeneracional y la incorporación de mozos al sector.

La última llinia va cuntar con 660.000 euros pa los planes d'esplotación de recursos pesqueros, que busquen ameyorar la sostenibilidá y garantizar l'actividá al llargu plazu.