Vuelve 'El Vasco'

L'oxetivu, convertise en reclamu turísticu

'El Vasco' volvió a amosar la so meyor cara. Una llinia histórica que tresportaba’l carbón del Caudal hasta Altos Hornos de Vizcaya, rompiendo’l monopoliu del momentu. Yera tamién el serviciu ferroviariu de viaxeros ente Mieres y la capital asturiana.

Güei recuperóse’l viaxe del ferrocarril Vasco-Asturianu que salió de Mieres. El tren llegó 10 minutos enantes de lo que se pensaba a Soto Ribera, onde se celebrará una xinta, porque nesti conceyu recibíase’l carbón pa la térmica.

L’actu inxértase dientro de les XVI Xornaes d’Historia y Patrimoniu de l’asociación Santa Bárbara.

Pal sieglu XXI, quier convertise en reclamu turísticu, un patrimoniu que tien que cuidase y cuntar con sofitos anovaos.

Los vecinos de Fuso reclamen la restitución del pasu a nivel qu’Adif eliminó va dos años

Precisamente al so pasu per Fuso de la Reina-Puerto, xusto onde se bifurcaba 'El Vasco' pa Uviéu o San Esteban de Pravia, el tren turísticu alcontróse con una concentración de los vecinos de la zona, qu’esixen el restablecimientu del pasu a nivel qu’Adif eliminó va dos años.

Agora, denuncien, el pueblu ta dividíu en dos y los vecinos vense obligaos a percorrer más d’un kilómetru pa dir d’un llau a otro o pasar "illegalmente" al traviés de les víes col peligru qu’eso conlleva.