L'asociación cultural 'Lo Nueso' caltién la tradición oral y musical del suroccidente d'Asturies

La vistimienta o los instrumentos son parte de lo que'l colectivu intenta caltener dende la so constitución fai más de 10 años

Como cada zona d'Asturies, la tradición musical y cultural tien distintes formes y el suroccidente cunta con unu de los estilos más marcaos. Dalgún d'esos puntos llamativos y diferenciales vese nos instrumentos qu'usaben pa crear ritmos y acompañar a los cantares como'l panderu o les castañueles.

El pandeiru en Cangas ye l'instrumentu cimeru p'acompañar a aquellos bailles que podíen dase en bodes, por casu. Un instrumentu que tien forma cuadrada y que foi sustituyíu tres la llegada de la pandereta en bien pocos casos señala Benito Sierra, de l'Asociación 'Lo Nueso'.

Dende l'asociación 'Lo Nueso' de Cangas trabayen pa caltener l'alcordanza de cómo yera la vida nel pasáu. Una d'eses alcordances ye la vistimienta qu'usaben los vecinos de la zona dende'l sieglu XVII hasta'l sieglu XIX. Nun teníen una estética uniforme porque hebo cambeos nos colores y na tela pero lo que nunca se perdió fueron los patrones básicos de la ropa que yera parte fundamental de la vida.

Otra de les tradiciones orales que se guarden son el cantu del aguilandu y los ramos que tamién formen parte d'esi legáu de la zona. Una tradición que nun se quier perder y una conocencia que tien que pasar de xeneración en xeneración pa caltener el folclor del suroccidente vivu.