Los vecinos de Llatores denuncien incumplimientos cola zona rural

Demanden meyores nes carreteres, el saniamientu, l'allumáu y les comunicaciones

L’Asociación de Vecinos de la parroquia de Llatores convocó pal xueves viniente una concentración de protesta énte la sede del Ayuntamientu d’Uviéu. Quieren denunciar los incumplimientos del equipu de Gobiernu cola zona rural.

Los vecinos aseguren que les carreteres de la zona son peligroses, ensin arcenes pa peatones y con poca llimpieza viaria. Adrián Martínez, miembru de l’Asociación de Vecinos Santu Tomás de Llatores, denuncia tamién qu’hai caminos públicos entá ensin asfaltar.

Problemes nes comunicaciones que lleguen hasta al tresporte públicu. Lleven siete años esperando l’ampliación de la llinia K de TUA pa que vecinos de Cellagú, Santu Medero, La Belonga o Ayones nun tengan qu’andar cuasi tres kilómetros hasta la parada más cercana, esplica Maripaz Alonso.

Les sos demandes, apunten, treslladáronles delles vegaes al Ayuntamientu d’Uviéu. Enagora, ensin éxitu, señala Trinidad López, vecina de Llatores.

Poro, el xueves viniente convocaron un actu de protesta énte’l Consistoriu en defensa de la zona rural. Nella pidirán tamién meyores nel saniamientu públicu, nel allumáu y l’ampliación de la rede de fibra óptica.