El Conceyu de Candamu va alegar escontra'l parque eólicu Bufarán

El Conceyu de Candamu va alegar escontra'l parque eólicu Bufarán

Plenu multitudinariu y llargu el que se vivió güei en Candamu. El puntu d'engarradiella fueron les mociones presentaes pol PP y Izquierda Xunida sobro'l proyectu del parque eólicu Bufarán.

Partido Popular y Izquierda Xunida presentaron dos mociones sobro'l proyectu del parque Eólicu Bufarán. Sicasí, namás la de los populares salió alantre, gracies al sofitu d'Izquierda Xunida.

D'otra manera, la moción d'Izquierda Xunida, que plantegaba'l refugu por parte del conceyu al allugamientu d'esos once aeroxeneradores nun foi alantre, por cuenta de la abstención del PP y el votu a la escontra del PSOE.

Dende Izquierda Xunida, nun quixeron faer declaraciones sobro esti desalcuerdu. Queda agora por ver si va afectar a la gobernabilidá d'un conceyu, onde fueron llave de Gobiernu tres l'empate a cuatro conceyales ente socialistes y populares.