El proyectu 'Escoba, la vieya' busca la reutilización testil

L'asociación ecoloxista Biodevas busca amenorgar el consumu de ropa

La industria testil ye la segunda más contaminante. Namás la superen los tresportes por combustible. La mayor problemática na producción de ropa ye la gran cantidá d’agua que necesita.

Pa contribuyir al fin d’esti problema, l’Asociación Biodevas creó’l proyectu 'Escoba, la vieya' en Llugones, col envís de reutilizar prendes de segunda mano. La fast fashion, o moda rápida, ye un fenómenu espardíu que medró’l consumu de ropa. Equí cualquiera pue donar les sos prendes a cambéu d’un vale pa intercambiar por otres. Toes cuesten ente 50 céntimos y 5 euros como máximo. Lo que nun ta en bon estáu recíclenlo o tresfórmenlo.

Necesiten voluntarios, porque llega muncha cantidá.

La mentalidá va camudando, y el tipu de públicu cada vegada ye más variáu, non solo alcontramos persones ensin recursos.

L’oxetivu ye que nun se tire nada. Abrieron l’espaciu nesti local social, y los vienres tamién salen a la cai al mercáu selmanal nel parque. Piensen dir a eventos y festivales.