Los primeros proyectos del pozu Carrio, pa 2025

Un centru d'anovación cimeru pa probar tecnoloxía industrial

El Gobiernu d'Asturies va tresformar l'antiguu pozu mineru de Carrio, nel conceyu de Llaviana, nun centru d'anovación con tres espacios estremaos que se van dedicar a llaboratoriu de pruebes industriales pa desenvolvimientu tecnolóxicu, actividaes empresariales y acciones culturales.

El Principáu va destinar cerca de 2,7 millones, cofinanciaos col Fondu de Transición Xusta (FTX), a la remodelación de les instalaciones esteriores de la mina y el desenvolvimientu del proyectu.

El plan director, presentáu esti xueves pol conseyeru de Ciencia, Empreses, Formación y Empléu, Borja Sánchez, y el director de l'Axencia Sekuens, David González, inclúi tres árees de trabayu: La sala de les máquines, dedicada a la tecnoloxía; La vida nel pozu, un espaciu pa la integración social y el coworking, y La galería, pa la creación y la cultura.

El proyectu surde de la idea de tresformar y reutilizar antigües esplotaciones mineres que, como Carrio, producíen carbón hasta apocayá, señala'l Gobiernu rexonal nuna nota na qu'abonda que la cesión de la instalación por parte d'Hunosa y la puesta en marcha d'una asociación integrada por instituciones y empreses y liderada pol Principáu faen posible esta nueva iniciativa, que quier contribuyir al tresformamientu económicu d'Asturies y la reactivación de la contorna minera.