Cada llar asturianu esperdicia 60 quilos de comida al añu

El Gobiernu quier aprobar una normativa p'amenorgar les cifres a la metá primero qu'acabe l'añu

Güei celébrase'l Día pa concencianos sobre l’esperdiciu alimentariu. Un problema que n'Asturies se traduz en que cada añu esperdiciamos por llar 60 quilos de comida, unos 26 quilos por persona. En total en toa Asturies 26 millones de quilos al añu.

N'España añalmente son por persona unos 65 quilos y mediu, 1.170 millones de quilos d'alimentos en total. Nel mundu xeneráronse más de mil millones de tonelaes de residuos, incluyíos los restos non comestibles, 132 quilos por persona. La mayoría d'esa demasía, un 60% xeneráronse nos llares. Unu de los oxetivos de l'axenda 2030 ye llegar a esa fecha amenorgando estes cifres a la metá. El gobiernu español quier aprobar una normativa con esi envís, primero qu’acabe l'añu.

La Llei de Prevención de les Perdes y Esperdiciu Alimentariu va convertir n'obligatories les donaciones d'escedentes. Les empreses de producción y distribución tendrán de da-yos salida primero que llegue la so fecha de caducidá apunta Juan José Cima, secretariu de la Fundación Bancu d'Alimentos.

Esto va suponer un cambéu de modelu. Les tiendes d'alimentación de más de 1.300 metros cuadraos van tener que roblar alcuerdos con bancos d'alimentos p'asitiar los sos escedentes y éstos van tener qu'informar de los alimentos que, pese a too, s’esperdicien.

Pa optimizar el procesu, la Federación de Bancos d'Alimentos desenvolvió una plataforma dixital.

La llei habilita amás a los bancos d'alimentos pa certificar el bon faer de les empreses. Incumplir la norma va poder acarretar sanciones d'ente cuatro mil y 500.000 euros.