Coxersa va reclamar a Tragsa el costu del arreglu de la planta quemada

El Conseyu d'Alministración del consorciu aprueba la xuba de tarifes pa 2025

Coxersa va dirixir a la empresa pública Tragsa una reclamación estraxudicial polos daños causaos pola quema rexistrada'l pasáu mes d'abril na planta de tratamientu de la fracción restu.

Asina lo avanzó esti llunes la conseyera de Transición Ecolóxica, Industria y Desenvolvimientu Económicu, Nieves Roqueñí, tres presidir les xuntes de la comisión delegada y del conseyu d'alministración de Coxersa, onde s'informó del conteníu d'un ampliu informe, de más de 500 páxines, sobro l'análisis forense del accidente.

Como adelantara apocayá la conseyera, la quema foi pol “apilamientu indebíu" d'una serie de cubos de pintura naval con restos de disolvente.

L'informe apunta que l'orixe tuvo na fricción o nuna chispa provocada pola escavadora que trabaya nesa zona de la planta p’apilar los residuos.

La quema entamó amás nun llugar onde nesi momentu tamién había munchos restos de muebles y madera.

Polo tanto, apuntó la conseyera, del informe deduzse un "fallu d'operación" nel que s'encadenaron una serie de circunstancies y "causes por acción o por omisión", de les que'l responsable sedría l'operador de la planta.

El Conseyu d'Alministración del consorciu tamién aprobó la xuba de la tarifa de xestión de la basura de la bolsa negra, esto ye, lo que tiramos ensin dixebrar. Pasa de 67 a 80 euros por tonelada. Un preciu que tien en cuenta que bona parte de 2025, la basura bruto va dir al vertederu hasta que la planta siniestrada se ponga de nuevo en marcha.