Fomentu repite que va treslladar al Ministeriu l'alternativa soterrada pal vial de Xove

Los vecinos d'Aboño piden a Barbón que nun tresllade'l conflictu de la vía a Carreño

El conseyeru de Fomentu repite que van treslladar al Ministeriu na xunta en Madrid que l'alternativa pal vial de Xove tien que ser soterrada.

Sobro la posibilidá de derivar el tráficu per Aboño, pel conceyu de Carreño, diz que nun hai un proyectu que se presentara como tal, pero comparte'l pidimientu de compensaciones por parte del alcalde.

Pela so parte, los vecinos d'Aboño consideren que derivar el tráficu a Carreño nun pue ser l'alternativa al vial de Xove. Güei unviaron una carta al presidente del Principáu na que-y piden que nun beneficie a los vecinos de la zona oeste de Xixón en perxuiciu de los d'Aboño.

La verdadera prioridá de la zona, afirmen, ye recuperar medioambientalmente un valle deterioráu y contamináu, que lleva 40 años siendo'l basureru de Xixón

Encamienten al Principáu a ser coherente coles polítiques entamaes pola industria de la zona p'amenorgar l'impactu ambiental y convídenlu a conocer la parroquia de Carrió.