Derechos Sociales ta trabayando p'axilizar el pagu de factures pendientes no que queda d'añu

Del Arco comprométese a que los 15 residentes del centru Valle del Sol vuelven a Xixón

La conseyera de Derechos Sociales y Bienestar, Marta del Arco, destacó esti martes les polítiques que ta desendolcando’l so departamentu pa "impulsar l'avieyamientu activu y saludable".

Del Arco, qu’inauguró nel auditoriu de La Pola (Siero) la xornada institucional conmemorativa del Día Internacional de les Persones Mayores, solliñó que la conseyería reforzó la financiación a los ayuntamientos pa la puesta en marcha de recursos y programes qu'atienden les situaciones de soledá non deseada.

Amás, recordó que'l Principáu trabaya na ellaboración de la estratexa autonómica nesti ámbitu “na que los apurrimientos de les asociaciones y centros de mayores sedrán clave".

La titular de Derechos Sociales avanzó que tamién se potenciará la ufierta formativa y cultural de los centros sociales, según les demandes de les persones mayores.

Nesti sen, dio anuncia de que la collaboración que’l so departamentu caltién col Muséu de Belles Artes d'Asturies ampliaráse a otros centros y equipamientos culturales.

Al empar, porque los más de les persones mayores quieren vivir na so casa y nel so entornu, Derechos Sociales ta reforzando los recursos de cercanía, que dexen recibir los sofitos necesarios en casa.

La conseyera tamién faló de "fortalecimientu" de la rede pública d'atención diurna, con nuevos centros en Piloña, Corvera, Gozón y Cuaña, a los que s'amestarán los equipamientos yá previstos en Somiedu, Villayón, El Valle Baxu de Peñamellera, Uviéu y Avilés.

Naciones Xuníes declaró'l 1 d'ochobre Día Internacional de las Personas Mayores, una xornada qu'esti añu celébrase baxo'l lema 'Avieyar con dignidá: reforzar los sistemes d'atención y l'asistencia a les persones mayores en tol mundu'.

La conseyería entamó les meses de debate 'Conectaos y seguros: Nueves tecnoloxíes y ciberseguridá pa persones mayores', cola participación de los colexos de l'abogacía d'Uviéu y Xixón, y otra sobre l'impactu de la intelixencia artificial nel serviciu de les persones mayores.

Al empar, abordaráse l'avieyamientu activu al traviés del fútbol, cola participación de les fundaciones del Real Sporting de Xixón y del Real Uviéu.

La conseyera de Derechos Sociales tamién se comprometió güei a que los 15 residentes que tán siendo desagospiaos del centru Valle del Sol vuelvan a Xixón en cuantes haya otru equipamientu disponible. L'ERA lleva ensin pagar eses places concertaes al xeriátricu dende 2021.