Paralizaes les obres de restauración del Palaciu de Peñalver

L'equipamientu amosaba graves problemes de cimentación y fendedures

El Palaciu de los Rodríguez León, tamién conocíu como Palacio de Peñalver, en Tresona, ta coles obres de remocique paralizaes por un contenciosu nos Tribunales. Unos trabayos que son imprescindibles pa salvar el que ye’l más grande y importante de los palacios del conceyu de Corvera.

La primer fase de les obres de restauración tán paralizaes, a la espera de que se resuelva’l contenciosu que tienen nos tribunales la propiedá cola empresa encargada de les obres. El Palaciu, en peligru de desaniciu, amosaba graves problemes de cimentación y fendedures. La familia Morenés, propietaria del inmueble entamó coles obres de reparación en 2021. La primera de les actuaciones céntrase nes torres, la cubierta, el patiu interior y la fachada.

Exemplu de l’arquitectura nobiliaria, creese que ye del sieglu XV. Foi casa solariega de los Rodríguez de León de la Casa de Tresona. Nel sieglu XVIII, pasó a manes de los Trelles, los Sierra y los Argüelles y nel XIX convirtióse en residencia de branu de los condes de Peñalver. Cunta con un nivel de protección altu porque ye Bien d'Interés Cultural (BIC).

La segunda fase nun tien entá fecha. Consistirá en completar la reforma del patiu interior y de la cubierta. L'usu que se dará al edificiu históricu una vegada acabe’l remocique entá nun ta definíu.

Creese que los propietarios intentarán rentabilizar la inversión, nun se descarta que puea llegar a ser un parador como otros BIC asturianos, y que l'edificiu vuelva a ser lo que daquella foi pal conceyu.