Otea pide formar a les 4.000 persones que busquen empléu nel sector

Almeida pide unificar normatives, controlar la vivienda turística y arrenunciar a les tases

El presidente de la patronal de turismu y hostelería d'Asturies, Otea, Jose Luis Álvarez Almeida, acabante escoyer pal so tercer mandatu al mandu de la patronal, reclamó esti xueves el control a la crecedera esponencial de les viviendes turístiques, l'arrenunciu a la implantación de la tasa turística, y la unificación de les normatives municipales de terraces.

El presidente d’Otea caltuvo esti xueves un alcuentru cola prensa pa presentar la nueva executiva de la organización empresarial y esbozó les llinies maestres que van guiar el so nuevu mandatu, que va tar basáu n'impulsar la competitividá del sector, esixir un mayor compromisu cola formación y les polítiques d'empléu pa cubrir la demanda de trabayadores y en reivindicar el modelu turísticu pol qu'apuesta la organización.

Almeida señaló como unu de los grandes problemes del sector turísticu y hosteleru la necesidá de mano d'obra, sorrayando lo inverosímil que resulta que los hosteleros nun atopen trabayadores cuando hai 10.000 paraos que busquen trabayu nel sector turísticu n'Asturies, de los qu’unos 4.000 podríen incorporase al mercáu si reciben una formación afayadiza.