Barbón propón esviar el tráficu pesáu hacia El Musel per Aboño y renaturalizar la zona

Moriyón cree que Tresportes dexa al Conceyu y al Principáu "ensin salida"

El presidente del Principáu, Adrián Barbón, avanzó esti vienres que, una vegada refugáu'l vial soterráu de Xove, la propuesta del so gobiernu va ser la d'esviar el tráficu pesáu pa El Musel per Aboño y executar un plan de renaturalización pa la zona.

En declaraciones a los periodistes n'Avilés, onde güei se celebró la xunta selmanal del Conseyu de Gobiernu, Barbón afirmó que na xunta celebrada ayeri en Madrid ente Tresportes, el Principáu y el Conceyu de Xixón punxeron les “coses clares".

L'alcaldesa de Xixón, Carmen Moriyón, criticó esti vienres la "cerrazón y enfotu" del Ministeriu de Tresportes con un vial de Xove en superficie y consideró que la so negativa a un soterramientu pal tráficu pesáu que circula pal cai d'El Musel dexa al conceyu y al Principáu "ensin salida".

La presidenta de la Federación Asturiana d'Empresarios (FADE), María Calvo, amosó esti vienres la so "decepción" énte l'abandonu del proyectu del vial de Xove "dempués de tantos años", al empar que pidió al Gobiernu del Principáu que tresllade al Ministeriu de Tresportes la “urxencia" de buscar una alternativa.

La vicepresidenta de la Federación d'Asociaciones Vecinales (FAV) de la zona urbana de Xixón, María José Cuervo, espresó esti vienres la "terrible decepción" de los vecinos col abandonu del proyectu del vial de Xove, daqué que consideraron "un insultu pa los ciudadanos".