El Principáu invierte 12,9 millones nun proyectu pa que la industria use l'agua de Villaperi

Barbón: "La industria asturiana va tener siempres agua pa poder desenvolver el so trabayu"

Les industries asturianes del área central van usar agua purificao de la estación depuradora d'agua residual (EDAR) de Villaperi en cuenta d’agua potable gracies a una inversión de cuasi 13 millones d'euros pa financiar un proyectu pioneru a nivel nacional que va empezar a executase'l próximu añu y que ta empobináu a la promoción de la economía circular.

El Conseyu de Gobiernu del Principáu, axuntáu esti vienres n'Avilés so la presidencia del xefe del Executivu asturianu, Adrián Barbón, dio lluz verde al financiamientu del contratu de redacción del proyectu y execución de les obres de la planta de rexeneración d’efluentes depuraos de la EDAR de Villaperi, n'Uviéu.

La planta yá foi llicitada y el contratu axudicóse a la unión temporal d'empreses (UTE) formada pola Sociedad de Fomento Agrícola Castellonense (Facsa) y les firmes asturianes Espina Obras Hidráulicas y Alvargonzález Contratas.