La propuesta del Principáu pasa por acceder a El Musel dende Aboño

Los vecinos consideren inxusta y egoísta l'apuesta de derivar el tráficu per Carreño

L’oxetivu de la propuesta del Principáu pa los accesos a El Musel ye llendar el tráficu pesáu de l’avenida Príncipe d’Asturies y la so apuesta pasa por acceder al cai dende Aboño.

Pa eso, la Conseyería propón reorganizar el ñudu de L’Empalme, adecentar la carretera que xune esta glorieta col cai y, amás, abrir el túnel d’Aboño, zarráu dende va 12 años. Pa llegar hasta Aboño dende les principales víes, la 'Y' o l’AS-II, ensin pasar per La Calzada, l’alternativa ye la carretera XI-10, que xune Lloreda y Veriña y que cunta con dellos accesos a los polígonos industriales de la zona.

Según el Principáu, el so desdoblamientu llicitaráse en primavera dempués de que les obres, qu’entamaron en 2017, paralizárense poco dempués.

El 8 de xunetu de 2017 entamaron les obres pa desdoblar la carretera que xune Lloreda y Veriña. El popular Íñigo de la Serna, ministru de Fomentu daquella, yá solliñaba la importancia d’esti proyectu pa meyorar los accesos a El Musel.

El proyectu pa duplicar estos tres kilómetros y mediu de vía cuntaba con una inversión de 33 millones d’euros. Les arques públiques dexaron amás 44 millones pa pagar las espropiaciones de los tarrenes afectaos. Los trabayos avanzaron rápido y en xineru de 2018 yá se podía ver los desmontes nos márxenes de la carretera.

Pero unos meses más tarde, en mayu, hubo que parar les obres. Les máquines topáronse con conductos de servicios que nun apaecíen nos planos. Había que volver a revisar el proyectu.

Dos años más tarde, el Ministeriu decidió resolver el contratu. Entós alegó que yá nun yera prioritariu al perder fuerza la idea d’acceder a El Musel per Aboño.

Agora’l Principáu considera vital duplicar la vía pa dar al tráficu pesáu una alternativa a La Calzada. La obra, confía la Conseyería, llicitaráse en primavera dempués de que volviere a encargase la redacción d’un proyectu en 2022.

Nesti tiempu, los desmontes que yá se ficieren fueron enllenándose de matos y son yá cuasi imperceptibles.

Los vecinos del valle d’Aboño consideren inxusta y egoísta l’apuesta de derivar el tráficu a El Musel per Carreño. Más de mediu millar de persones viven nes parroquies de la zona. Nel so día a día tienen que llidiar con un tráficu diariu de 1.600 camiones y cola actividá de la industria pesada asitiada ellí.