Cinco de los 10 acusaos de concertar matrimonios illegales acepten hasta seis meses de cárcel

La muyer considerada como la cabezalera del grupu comparecerá mañana énte'l xulgáu

Cinco de les diez persones acusaes de los delitos de grupu criminal, matrimoniu illegal y falsedá documental por concertar matrimonios de conveniencia ente españoles y nixerianos aceptaron esti llunes penes d’ente tres y seis meses de prisión dempués d’algamar un alcuerdu cola Fiscalía.

El xuiciu taba señaláu esti llunes nel Xulgáu de lo Penal númberu 3 d’Uviéu, anque la vista treslladóse a les dependencies del Tribunal Cimeru de Xusticia d’Asturies (TCXA) por problemes d’espaciu.

Los acusaos formaben parte d’una rede qu’organizaba matrimonios de conveniencia por dineru y participaron, como contrayentes o como testigos, nos matrimonios illegales ente los años 2005 y 2011.

El fiscal apreció la circunstancia modificativa de la responsabilidá penal de “dilaciones indebíes”, porque “la causa tuvo paralizada en periodos de tiempu mui importantes ensin causa imputable” a los acusaos, que vieron por esti motivu rebaxes de les sos penes.

Asina, dos de los acusaos sedrán condenaos a una pena individual de seis meses de prisión y otros tres procesaos, a tres meses de cárcel.

Al respective del restu de los acusaos, cuatro d’ellos tán en paraderu desconocíu y con órdenes de búsqueda, mientres que la muyer que ta considerada como la cabezalera del grupu comparecerá mañana énte’l xulgáu.

Pa ella la fiscalía solicita 8 años de prisión polos delitos de grupu criminal, matrimoniu illegal, falsedá documental y robu d’estáu civil.