Les 454 farmacies asturianes podrán ser puntos violeta

Delegación del Gobiernu da anuncia de qu'ufiertará formación a los farmacéuticos

La delegada del Gobiernu n’Asturies, Adriana Lastra, y el presidente del Colexu de Farmacéuticos d’Asturies, Alfredo Menéndez, roblaron esti llunes un protocolu de collaboración pa que les 454 farmacies qu’hai n’Asturies puean convertise en puntos violeta d’atención a víctimes de violencia machista.

Nun comunicáu, la Delegación del Gobiernu dio anuncia de qu’ufiertará formación a los farmacéuticos pa saber cómo actuar nos casos nos que detecten un casu de violencia machista o cuando una víctima vaya al establecimientu pidiendo ayuda.

Tamién s’esparderán ente les farmacies folletos informativos colos recursos colos que cunten les víctimes y en cada una d’elles habrá un distintivu con un códigu QR con accesu a información.

El protocolu robláu col Colexu de Farmacéuticos “pue salvar vides”, destacó Lastra, qu’afirmó que les farmacies sedrán “llugares seguros pa les muyeres que sufren violencia de xéneru”, na robla del alcuerdu.