Los vecinos de Carreño proponen la carretera de La Reguerona como alternativa al pasu de camiones a El Musel

Refuguen que se tresllade tol tráficu pesáu pela glorieta d'Aboño

Los vecinos de Carreño proponen utilizar la carretera de La Reguerona como alternativa al pasu de camiones a El Musel. Una vegada descartáu’l vial por Xove, les asociaciones vecinales de Carreño refuguen que se tresllade tol tráficu pesáu pela glorieta d’Aboño, una zona de por sí yá degradada.

Delles asociaciones vecinales de les parroquies de Carreño coordináronse pa proponer una alternativa que consideren rápida, barata y llimpia una vegada descartáu’l vial de Xove en Xixón. Ye la carretera que va pegada al monte de Xove-Veriña, conocida como la carretera de La Reguerona, que pasa xunto a la planta depuradora del mesmu nome y cerca de la central térmica.

La carretera, que pertenez a Xixón, va dende’l pasu a nivel de la carretera vieya de Veriña hasta l’antiguu túnel d’Aboño. Dende ehí, espliquen los vecinos, podría siguir pal nuevu túnel, d’accesu restrinxíu a los vehículos del cai.

Esa carretera tien dos carriles y anchu abondu pa ser ampliada. Los vecinos aseguren que ta en bon estáu de caltenimientu poro, nun necesitaría grandes inversiones.

Los vecinos de Carreño refuguen derivar tol tráficu pesáu pela glorieta de L’Empalme n’Aboño, que yá aguanta’l pasu de más de la metá de los camiones que van al cai d’El Musel. Les asociaciones vecinales insisten en que tán a disposición de les alministraciones p’analizar la propuesta.