IX-Convocatoria por Asturies quier qu'Hunosa seya una empresa enerxética estatal

Tomé recuerda'l non de la formación a la so propuesta pa crear una empresa pública d'enerxía

IX-Convocatoria por Asturies apuesta pola creación d'una empresa pública d'enerxía que favoreza la competitividá de la industria asturiana, ayude a combatir la probeza enerxética de munches families y encárguese de la estratexa de descarbonización y el consiguiente amenorgamientu de la contaminación.

Ente los sos cometíos taría'l suministru d'enerxía a los edificios de l'alministración asturiana, que tienen de cuntar con instalaciones solares en 2030; l'impulsu del autoconsumu colectivu y de les comunidaes enerxétiques; l'atracción d'enerxía llimpio y la participación nel desenvolvimientu de proyectos anovables.

Según el voceru de la coalición na Xunta Xeneral del Principáu, Xabel Vegas, países como Francia cunten con empreses públiques que-yos dexen regular el preciu de la enerxía, un “elementu básicu" p'Asturies, qu'amás podría aprovechar la esistencia d'Hunosa pa consiguilo.

Esta propuesta, que va ser defendida nel plenu que la Xunta Xeneral del Principáu va celebrar la próxima selmana, nun tien de ser namás una considerancia política "sinón una prioridá que trescienda cualquier “matiz ideolóxicu" y que conduza a un gran pactu autonómicu pola enerxía.

Ante esta iniciativa, la diputada del Grupu Mistu Covadonga Tomé amosóse sorprendida yá que nel alderique sobro l'estáu de la rexón ella plantegó una propuesta de resolvimientu na que faía'l mesmu pidimientu y que cuntó col votu a la escontra d'IX.