Moriyón considera invidable la recuperación de los antiguos xulgaos de Prendes Pando

La corporación municipal recibe la Medaya conmemorativa pol Centenariu de la Fidma

L'alcaldesa de Xixón, Carmen Moriyón, considera invidable pa la ciudá la recuperación de los antiguos xulgaos de Prendes Pando, que lleven en desusu dende 2013. Nel plenu celebráu esta mañana, PSOE, IX y Podemos encamentaron al conceyu a pidir la cesión gratuita del edificiu, anque esti nun ye competencia de l'alministración municipal. La propuesta foi refugada colos votos a la escontra de VoX, PP y Foro.

Moriyón reconoció que nun se pue renunciar, pero, qu'agora nun ye asumible la so rehabilitación, con un costu d'alredor de los 20 millones d'euros pa usos sociales, porque ye competencia del Principáu d'Asturies.

Foro, PP, VoX y el conceyal non adscritu, Oliver Suárez, votaron a la escontra y valtaron la propuesta conxunta presentada pol grupu municipal socialista, Izquierda Xunida y Podemos Xixón, Más País y Izquierda Asturiana pa que'l Gobiernu local recupere l'edificiu y pa cerrar col Principáu un conveniu de cesión gratuita del inmueble pa construyir un espaciu integráu de serviciu públicu, anovación y alcuentru.

La corporación municipal recibe la Medaya conmemorativa pol Centenariu de la Fidma

La corporación municipal xixonesa recibió la medaya conmemorativa pol centenariu de la Fidma. La distinción apurrida forma parte d'una serie llendada de 30 unidaes de les que yá s'apurrieron más de la metá a instituciones y entidaes de referencia nel Principáu.

La primera foi pal rei d'España.

El presidente de la Cámara de Comerciu, Félix Baragaño destacó'l sofitu del conceyu al recintu ferial al que definió como un elementu dinamizador pal Principáu al traviés de congresos, feries y otros eventos.