Los sindicatos UXT y CCOO convocaron una manifestación el próximu 30 d'ochobre en Xixón

Los sindicatos piden que se cumpla la normativa y mano dura pa quien incumple

Los sindicatos UXT y CCOO convocaron una manifestación el próximu 30 d'ochobre en Xixón en respuesta al aumentu de la siniestralidá llaboral nes últimes selmanes n'Asturies.

Les organizaciones sindicales entá tán perfilando los detalles d'una marcha que, previsiblemente, va tener llugar a les 19:00 hores con salida dende la plaza de L’Humedal y llegada énte'l Conceyu de la ciudá.

UXT y CCOO ficieron un llamamientu a la ciudadanía pa que la concentración seya "masiva", porque’l "andanciu" d'accidentes llaborales nel Principáu tien de ser visualizáu “pola sociedá".

Dambos sindicatos participaron esti xueves nuna concentración escontra la siniestralidá tres la muerte'l martes d'un trabayador de 62 años del sector de la construcción nel barriu xixonés de Nuevu Roces, qu'alza a trelce los accidentes mortales na comunidá no que va d'añu y a cinco en poco más d'un mes.

Cifra de muertos "inasumible"

Pela so parte, el secretariu de Salú Llaboral y Medioambiente d'UXT n'Asturies, Marino Fernández, aseguró que les cifra de muertos n'accidentes llaborales ye "inasumible"

"Tou accidente ye evitable y, por eso, creemos que les empreses nun tán cumpliendo cola llei de prevención de riesgos llaborales", afitó.