Llanes nun va conceder llicencies de viviendes d'usu turísticu per un añu

El Gobiernu local aprobóse en plenu'l próximu miércoles

El Conceyu nun va dar más llicencies a les poblaciones urbanes que tengan más de cinco viviendes d'usu turísticu por cada 100 llares. Les más tensionaes son Posada y Po con más de nueve agospiamientos turísticos, pero tamién tán afectaes San Roque, Barru, Llanes, Celoriu y Nueva.

Na zona rural, tampoco van dar más llicencies a les aldegues d'El Cerecéu, Picones, La H.errería y Rabiaos, yá que tienen más del 25 por cientu de viviendes destinaes al usu vacacional.

Anguaño, Llanes cunta con más de 5.600 places d'usu turísticu ente pisos y cases, según l'estudiu de la Universidá d'Uviéu.

Calcúlase qu'a finales del añu pasáu había n'Asturies cuasi 5.700 viviendes vacacionales o d'usu turísticu. La so crecedera foi n'aumentu nos últimos años.

Ente 2010 y 2019 diose d'alta una media de 250 viviendes d'usu turísticu al añu. A partir de 2020, esa cifra disparóse y de media abrieron seiscientos agospiamientos d'esti tipu al añu.

Pa poner orde y frenu a esti ascensu, el Principáu modificó la Llei de Turismu. La reforma, qu'entá se ta tramitando, recueye que les comunidaes de vecinos puen vetar l'apertura d'un pisu turísticu bien estableciéndolo nos sos estatutos o por alcuerdu de la mayoría.

Esta mesma selmana, el Tribunal Supremu sentenció que les comunidaes puen prohibir l'apertura d'estos agospiamientos por mayoría de tres quintos.

Amás, na regulación del Principáu esixe que los pisos arriéndense dafechu, nunca por habitaciones, que seyan accesibles, que nun seyan de protección y que tean debidamente inscritos y identificaos.