Medría de los delitos escontra la intimidá y l'acosu escolar pol mal usu de les redes sociales

La Fiscalía insiste na importancia de concienciar y controlar los dispositivos de los menores

Dieciséis denuncies rexistráronse l’añu pasáu n’Asturies pol espardimientu de semeyes o vídeos íntimos de menores nes redes sociales. Delitos escontra la intimidá que medren y qu’esmolecen a la Fiscalía de Menores.

Según un estudiu de la Federación d’Asociaciones pa la prevención del maltratu infantil, cerca d’un 2% de los menores d’ente 13 y 17 años almite compartir imáxenes de conteníu sexual. Dende la Fiscalía alvierten tamién de la medría del acosu escolar al traviés de les redes.

Esmolecen les griesques y humillaciones que se cuelguen na rede, viralícense y tienen graves consecuencies pa les víctimes. La Fiscalía recuerda que, p’actuar escontra ello, l’axencia de protección de datos tien una canal prioritaria onde se pue reclamar la retirada darréu d’esos vídeos qu’afecten a menores.

La necesiá de concienciar a los adolescentes y de controlar los dispositivos son otres de les recomendaciones que la fiscal Rodríguez Montequín destacó nuna charra entamada pol Colexu d’Abogaos d’Uviéu.