Carreño plantea les sos esixencies y refuga'l tráficu pesáu na rotonda de L'Empalme

El Gobiernu municipal nun entiende que s'abandonare'l diálogu sobre'l proyectu del vial soterráu per Xove

L’Ayuntamientu de Carreño refuga la medría de tráficu pesáu pela rotonda de L’Empalme. Ye una de les condiciones que’l so alcalde, Ángel García Vega, punxo al Principáu pa negociar una alternativa al frustráu vial per Xove.

El Gobiernu municipal tampoco entiende que s’abandonare’l diálogu sobre’l proyectu del vial soterráu per Xove col Ministeriu. Nun comunicáu del consistoriu, indícase que, según los vecinos, Carreño namás negociará col Principáu si la propuesta cumple cuatro premises:

La eliminación del tresporte pesáu pela glorieta de L’Empalme n’Aboño y l’AS-19, la carretera que xune Xixón y Avilés. Un plan d’ordenación, inversión y conservación d’esi ñudu y les parroquies de la llende, que meyore la calidá de vida de los vecinos.

La rexeneración ambiental de tola zona afectada y l’apertura del túnel d’Aboño pa usu de los vecinos de Carreño.

L’alcalde, Ángel García Vega, de Izquierda Xunida, asegura nel mesmu escritu, que na so última conversación col conseyeru de Fomentu, Alejandro Calvo, afitóse que’l Principáu entá nun tien propuesta preparada nin borrador de proyectu sobre’l que debatir.

García Vega tamién afea a l’alministración autonómica que tardare 30 años en reconocer la degradación d’esta zona de Carreño y el pocu compromisu de les empreses agospies na so contornada.