El Principáu asitia en Castropol la primer piedra de la memoria del occidente

Actu na alcordanza d'un vecín de Barres, asesináu polos nazis a los 29 años

El Gobiernu d'Asturies asitió esti miércoles en Castropol la primer piedra de la memoria nel occidente pa recordar a Manuel Villar Arias, víctima española del nazismu que foi deportáu al campu de concentración de Mauthausen, n'Austria, onde morrió con 29 años.

Col allugamientu d'esti Stolpersteine, como se conoz esti proyectu de recuperación de la memoria, el Principáu lleva yá instalaos 45 de los cerca de 190 adoquinos previstos pola Conseyería d'Ordenación de Territoriu, Urbanismu, Vivienda y Derechos Ciudadanos.

La viceconseyera de Derechos Ciudadanos, Beatriz González Prieto, participó na instalación de la piedra de la memoria na parroquia de Barres, onde nació Manuel Villar Arias el 1 de xineru de 1913.

Foi exiliáu a Estrasburgo (Francia) y, dende ellí, deportáu al campu de concentración de Mauthausen-Gusen el 13 d'avientu de 1940, onde foi asesináu'l 15 de xineru de 1942.

Nel actu, que se desenvolvió al pie de la casa de Barres na que vivió Manuel Villar Arias, participaron tamién l'alcalde de Castropol, Javier Vinjoy Valea, familiares y representantes del Grupu de Deportaos Asturies.

La viceconseyera espresó'l compromisu políticu de percorrer na presente llexislatura cada requexu d'Asturies coles mires “d'homenaxar les vides de tolos deportaos".

Anguaño, el proyectu cunta con una partida de 20.000 euros nos presupuestos de 2024 p’asitiar 110 adoquinos.

El proyectu 'Stolpersteine' empezó en 1992 como una idea personal del artista alemán Günter Demnig pa rindir tributu a les víctimes del Holocaustu y caltener viva la so memoria.

Ye un fenómenu internacional que yá llogró instalar más de 100.000 piedres en toa Europa.