La temporada del salmón de 2025 va caltener el cupu y va amenorgar el so horariu una hora y media

La normativa de pesca fluvial tien "calter continuista"

La temporada de salmón del próximu añu va empezar el domingu 13 d'abril y va allargase hasta'l 15 de xunetu, y según la propuesta del Principáu caltendrá'l cupu de tres prindamientos per zona y una por pescador al día y va amenorgase l'horariu de pesca al empecipiase media hora más tarde y rematar una hora antes.

Según informó'l Gobiernu autonómicu nun comunicáu, la Conseyería de Mediu Rural y Política Agraria presentó esti miércoles na xunta del Conseyu de los Ecosistemes Acuáticos y de la Pesca n'Agua Continental el borrador de la normativa de pesca fluvial pa 2025, que tien “calter continuista” al respective d’años anteriores.

La normativa propuesta “caltién los cupos de captura de tres salmones per día, tanto en zones llibres como en cotos”, y el de “un salmón por pescador y día, nes modalidaes con o ensin muerte” y establez que l'Alministración autonómica “va ser la encargada d'informar sobre la prohibición de siguir cola pesca una vegada cubiertu esi cupu”.

Amás, la nueva propuesta amenorga l'horariu de pesca del salmón, que va empecipiar media hora más tarde que na pasada temporada, concretamente a les 7:00, y va adelantar el zarru a una hora enantes del atapecer, coles mires d'evitar “que los pescadores tengan que facer sorteos ensin lluz”.

Na xunta del conseyu tamién se dio a conocer el censu serondiegu de salmón na cuenca del Narcea, na que se medró un 5,5%, hasta algamar los 460 exemplares, mientres que nel restu de cuenques fluviales nun se pudo facer el contéu por cuenta del so eleváu caudal, pero espérase qu’esos datos puean conocese a finales d'añu, según el Principáu.