Les cooperatives de tresporte planteguen meyorar la salida per L'Empalme d'Aboño pa sacar el tráficu pesáu del centru de Xixón

Avilés celebra'l Congresu Nacional de Tresporte Terrestre

Los tresportistes de mercancía pesada consideren, que la meyor solución pa sacar esti tipu de tresporte del centru de Xixón, ye meyorar la salida pela glorieta de L’Empalme d’Aboño. Creen que ye la midida más barata, y que meyor respuende a les necesidaes de los tresportistes que dan serviciu, ente otros, al cai d’Avilés, al de Xixón y a Arcelor destaquen José Manuel Martínez, presidente de la Cooperativa del Tresporte Asturcoop; y José Ramón Sánchez, presidente de la Cooperativa Avilesina de Tresporte.

Los espertos presentes nel congresu, sicasí, afirmaron que’l tráficu que más incomoda la ciudadanía ye’l de les furgonetes. Vehículos que medraron dende la pandemia, sobre manera pola medría de les compres online apunta Miguel Ángel Bravo Martínez, oficial de la Policía Local d’Alcalá de Henares.

El sector del tresporte afirma que falten conductores, sobre manera de tresporte de llarga distancia. La esixencia del CAP, certificáu de capacitación, asina como la dureza del trabayu, tán siendo elementos disuasorios a la hora d’acceder a esti trabayu.