El Principáu suspende instalar parques de bateríes y entama nueves directrices esti añu

Ente les alegaciones que recueye'l testu normativu tán la esclusión d'estes instalaciones en núcleos rurales

El Conseyu de Gobiernu aprobará enantes de que remate l’añu un decretu pa suspender les autorizaciones pa la instalación de parques de bateríes en suelu non urbanizable. Y, al empar, el Principáu entamará los trámites pa la redacción de les directrices qu’afitarán unos criterios xenerales pal afitamientu ordenáu d’estos proyectos.

El director xeneral d’Ordenación de Territoriu, Ignacio Ruiz Latierro, dio anuncia esti xueves d’estes midíes dempués de tener una xunta con una de les empreses que presentaren alegaciones al decretu na fase de consulta pública, na que tamién participó’l conseyeru Ovidio Zapico.

Nesta fase de consulta pública del testu normativu presentáronse 21 alegaciones, de les que les más, 13 en concreto, correspuenden a asociaciones y plataformes vecinales que soliciten la regulación estricta d’esti tipu d’instalaciones nel mediu rural, mientres que’l restu (8) ficiéronles empreses y asociaciones empresariales que tienen intereses na puesta en marcha d’estos parques de bateríes.