Arcelor para diez díes el tren d'alambrón y nueve l'acería pola falta de pidíos

La patronal europea pide "midíes urxentes" pa reflotar un sector que pasa "la so peor crisis"

El tren d’alambrón qu’ArcelorMittal tien na so factoría de Veriña, en Xixon, va caltenese paráu diez díes a partir d'esti vienres mientres que l'acería va dexar de producir nueve xornaes a partir del próximu llunes pola falta de pidíos derivada de la entrada masiva a la Xunión Europea de productos siderúrxicos de terceros países y los altos precios de la enerxía.

Según fontes de la multinacional siderúrxica consultaes por EFE, la parada del tren d’alambrón ente güei y el 27 d'ochobre, dambos incluyíos, va afectar a unos 180 trabayadores de la factoría xixonesa anque non toos se verán afectaos pol espediente temporal de regulación d'empléu yá que munchos van poder acoyese a descansos, vacaciones o reconocencies médiques pendientes.

Nel casu de l'acería, van ser 280 emplegaos los que se van ver afectaos na mesma midida entre'l 20 y el 28 d'ochobre, como yá pasó n'otres ocasiones a lo llargo del añu nos que se llevaron alantre paros intermitentes de l'actividá p’adaptar la producción al mercáu.